MAMBO UWANJANI

Mwenyekiti wa Klabu ya Simba, Murtaza Mangungu amewataka Wanachama na Mashabiki wa Klabu hiyo kudumisha utulivu wakati huu ambao klabu inaelekea katika mchakato wa uchaguzi, akisisitiza kuwa zoezi hilo litafanyika kwa mujibu wa Katiba na taratibu zilizowekwa. Mangungu amesema licha ya kuwepo kwa changamoto na misuguano mbalimbali ndani ya klabu hiyo, amejitahidi kusimamia mambo kwa kuzingatia taratibu na kuhakikisha kuwa tofauti zilizojitokeza hazisababishi mpasuko mkubwa ambao ungeweza kuleta hasara kwa klabu. Kuhusu suala la uchaguzi, Mangungu ameeleza kuwa kwa mujibu wa utaratibu uliopo, uchaguzi hufanyika baada ya muda wa uongozi uliopo kukamilika, huku akibainisha kuwa muda wa mwisho wa uongozi wa sasa ni Januari 30, ambapo miaka minne ya uongozi itakuwa imetimia. Aidha, amewataka Wanachama wenye hoja au maoni kuhusu mchakato huo kuyawasilisha kupitia vikao vinavyotambulika badala ya kutumia misukumo inayoweza kuathiri utulivu na mshikamano wa klabu.

Rais wa Yanga SC Injinia Hersi Said ameonesha fahari yake baada ya kualikwa na Shirikisho la Soka Duniani (FIFA) kuwasilisha programu rasmi ya mafunzo ya FIFA Diploma in Football Law, katika Module 3 inayofanyika Rabat, Morocco. Hersi Hersi Said ameeleza kuwa mwaliko huo ni ishara ya imani na heshima anayopewa, sambamba na kutambua maendeleo yaliyofikiwa na klabu yake. Aidha, ameonesha umuhimu wa Afrika kuwa na sauti yenye nguvu katika mijadala na maamuzi yanayohusu mustakabali wa soka la dunia. Ameishukuru FIFA kwa kumpa jukwaa hilo na kueleza fahari yake ya kuiwakilisha Afrika katika mjadala huo wa kimataifa.

Beki wa kati wa Azam FC Lameck Lawi ameandika barua ya kuomba kuondoka Azam FC katika dirisha dogo la usajili linalokuja ili ahamie timu nyingine ambapo atapata nafasi ya kucheza kikosi cha kwanza baada ya kukosa nafasi hiyo Azam FC. Lawi alijiunga na Azam FC akitokea Coastal Union na hana nafasi chini ya kocha Florent Ibenge ambaye nae ni kama bado hana kikosi maalum cha kwanza kutokana na mabadililo ya mara kwa mara. “Ni kweli Lawi ameomba kuondoka dirisha dogo anataka kwenda kutafuta changamoto nyingine nje ya Azam FC ambayo kwa sasa anapata nafasi ya kufanya mazoezi na timu bila ya kucheza.” kimesema chanzo cha uhakika ambacho hakijataka jina lake litajwe. Mara ya mwisho Lawi kuitumikia Azam FC kwenye mechi za ushindani ilikua Mapinduzi Cup Zanzibar dhidi ya Simba SC, Lawi aliifungia timu yake bao la kichwa dakika ya 73 kwenye nusu fainali ya Kombe la Mapinduzi mnamo Januari 8, 2026 lakini pia alionekana dhidi ya Yanga kwenye CRDB Cup.

Aliyekuwa mtangazaji katika kipindi cha jana na Leo kinacho rushwa na Wasafi Fm Haji Manara, amefukuzwa kazi kwa kile kinachodaiwa ni kukosa maelewano na watangazaji wenzake wa kipindi hicho, Edo Kumwembe na Oscar Oscar. Kwa mara ya kwanza Kumwembe na Oscar walipeleka malalamiko kwenye uongozi wa Wasafi lakini hawakupewa ushirikiano, wakaenda kwa kumkurugenzi ambaye ni Diamond pia hawakupata ushirikiano. Awamu hii ya pili walipeleka ombi la kuacha kazi ili wamuachie Manara kipindi lakini uongozi wa Wasafi Media kwa kushirikiana na Diamond wameamua kumpumzisha Haji Manara ndo sababu mpaka sasa Haji Manara haonekani kwenye kipindi cha Jana na Leo pale Wasafi. Inasemekana ndo sababu Manara hajaonekana kwenye msafara wa Davido kitu ambacho ni tofauti hasa ukizingatia kwenye matukio yote ya kiburudani yanayo mhusu diamond ndani ya nchi manara amekuwa bega kwa bega na Diamond.

Mbunge wa Kigoma Mjini, Clayton Chipando ambaye pia ni mwanzilishi wa mashindano ya Baba Levo Cup ameamua kuiondoa timu ya Polisi Kigoma kwenye mashindano hayo, kufuatia kukamatwa kwa wachezaji saba wa timu ya Kibirizi FC. Kupitia taarifa yake, Mbunge huyo amesema mchezo kati ya Polisi Kigoma na Kibirizi FC uliopangwa kuchezwa leo katika mashindano hayo mkoani Kigoma hautafanyika kama ilivyopangwa, baada ya wachezaji saba wa Kibirizi FC kukamatwa tangu jana na kuwekwa mahabusu. Amesema kutokana na tukio hilo, ameamua kuiondoa Polisi Kigoma kwenye mashindano hayo ili waendelee na majukumu yao ya ulinzi wa taifa.

Klabu ya Yanga SC imepata pigo baada ya kiungo wake muhimu, Maxi Nzengeli, kupata jeraha la goti litakalomweka nje ya uwanja kwa takribani wiki sita. Meneja wa Habari wa klabu hiyo, Ally Kamwe, amethibitisha taarifa hizo, akibainisha kuwa nyota huyo alipata maumivu hayo kwenye mchezo wa mwisho wa Ligi Kuu hivyo atakuwa nje ya dimba kwa kipindi hicho. Kamwe pia amebainisha kuwa endapo hali yake haitaimarika baada ya tathmini ya awali, mchezaji huyo huenda akalazimika kufanyiwa upasuaji. Kikosi cha Yanga kwa sasa kipo kambini visiwani Zanzibar chini ya Kocha Mkuu mpya, Fadlu Davids, kikijiandaa kwa mechi za kimataifa na Ligi Kuu ya NBC.