Na Mrisho Hassan. Dar es Salaam
Nyota wa kigeni wa mabingwa wa soka Tanzania bara, Yanga SC, Mzimbabwe, Thabani Scara Kamusoko na Mrundi, Amissi Joselyin Tambwe leo wameanza mazoezi rasmi katika uwanja wa Uhuru jijini Dar es Salaam baada ya kukosekana kwa kipindi kirefu.
Kamusoko aliumia na kukosa mechi kadhaa za klabu yake na Amssi Tambwe alishindwa kabisa kuitumikia Yanga tangu inaanza msimu mpya naye akiwa na majeraha, lakini nyota hao wawili leo wameungana na wenzao na kurudisha matumaini mapya kwa mabingwa hao ambao Jumamosi ijayo watashuka kwenye uwanja wa Azam Complex, Chamazi kucheza na Tanzania Prisons mchezo wa Ligi Kuu ya Vodacom Tanzania bara.
Yanga iliichabanga Mbeya City mabao 5-0 katika uwanja wa Uhuru Dar es Salaam wikiendi iliyopita bila kuwepo mastaa wake hao, hivyo kwa uwepo wao, Prisons inaweza kuchabangwa zaidi ya mabao hayo kama haijagangamala
Thabani Kamusoko (Kushoto) amerejea mazoezini leo, (Kulia) ni kocha George Lwandamina