Washindi wa pili wa msimu uliopita, Azam, nao walishinda mechi yao ya pili mfululizo jana baada ya kuibwaga Stand United kwa magoli 2-0 na kujiimarisha katika nafasi pili.
Kulikuwa na ushindi mwingine mkubwa mjini Mbeya wakati wenyeji Mbeya Ciy walipowasambaratisha JKT Ruvu kwa magoli 3-0 kwenye Uwanja wa Sokoine.
Kwenye Uwanja wa Taifa jijini Dar es Salaam, beki wa kati wa kimataifa wa Yanga kutoka Rwanda, Mbuyu Twite, ndiye aliwafungia mabingwa hao watetezi bao la kwanza katika dakika ya 27 akiwahi mpira uliotemwa na kipa wa Prisons, Mohammed Yusuph. Kipa huyo alitema mpira wa ‘fri-kiki’ uliopigwa na Haruna Niyonzima.
Sekunde chache kabla ya kwenda mapumziko, Mrundi, Amissi Tambwe, aliipatia Yanga bao la pili kwa kichwa akiwahi mpira wa faulo uliopanguliwa na kipa wa Prisons, Mohammed Yussuf.
Mzimbabwe Donald Ngoma aliifungia Yanga bao la tatu kwa njia ya penalti katika dakika ya 60 baada ya Refa, Alex Mahaggi, kutoka Mwanza kutoa adhabu hiyo kufuatia Msuva kuangushwa ndani ya boksi akiwa anaelekea kufunga.
Kabla ya kutoa penalti hiyo, Mahaggi, alimuonyesha kadi nyekundu beki wa Prisons, James Josephat, ambaye awali alikuwa na kadi ya njano. Simba ililifunika kabisa jinamizi la kukosa matokeo kwenye uwanja wa Mkwakwani baada ya jana kupata ushindi wa pili mfululizo kupitia magoli ya kiungo Mzimbabwe Justice Majabvi na ‘straika’ Mganda Hamis Kiiza.
Simba walipata goli lao la kwanza katika dakika ya 27 kupitia kwa kiungo wake, Majabvi aliyeunganisha mpira wa kona uliopigwa na Peter Mwalyanzi kabla ya Kiiza aliyeingia kuchukua nafasi ya Awadhi Juma kutupia goli la pili kufuatia piga nikupige langoni mwa Mgambo na kuilipia kisasi timu yake ambayo msimu uliopita ililala 2-0 dhidi ya Mgambo uwanjani hapo.
Mafanikio hayo yalifuatia ushindi wa 1-0 dhidi ya African Sports Jumamosi iliyopita, ambao ulikuwa wa kwanza na goli lao la kwanza Mkwakwani kwa miaka minne iliyopita. Kabla ya ushindi wa Jumamosi, Simba ilikuwa haifunga goli lolote uwanjani hapo tangu Agosti 24, 2011 waliposhinda 1-0 dhidi ya Coastal Union kupitia bao la Patrick Mafisango, ambaye sasa ni marehemu.
Kwenye Uwanja wa Kambarage, mabingwa wa mwaka juzi, Azam waliibwaga Stand United 2-0 kupitia goli la straika mpya Mkenya, Allan Wanga, na la kiungo Frank Domayo, ukiwa ni ushindi wao wa pili mfululizo msimu huu baada ya kuifunga Prisons ya Mbeya 2-1 katika ufunguzi wa msimu kwenye Uwanja wa Azam Complex Jumamosi iliyopita.
Kikosi cha Yanga: Ally Mustapha ‘Barthez’, Mbuyu Twite, Mwinyi Haji, Nadir Haroub ‘ Cannavaro’, Kelvin Yondani, Thabani Kamusoko, Saimon Msuva, Haruna Niyonzima/ Geofrey Mwashiuya (dk.81), Amissi Tambwe/ Malimi Busungu (dk.85), Donald Ngoma na Deus Kaseke/ Salum Telela (dk 66).
Simba: Manyika Peter, Mohamed Hussein ‘Tshabalala’, Hassan Kessy, Juuko Mursheed, Hassan Isihaka, Justice Majabvi, Awadhi Juma/Hamis Kiiza (58), Said Ndemla/Papa N’daw (86), Mussa Mgosi/ Ibrahim Hajibu, Mwinyi Kazimoto, Peter Mwalyanzi.
Matokeo kamili ya mechi za jana za Ligi Kuu ya Tanzania Bara:
Yanga 3-0 Prisons
Mgambo 0-2 Simba
Stand United 0-2 Azam
Mbeya City 3-0 JKT Ruvu
Ndanda 1-0 Coastal Union
Toto 1-2 Mtibwa
Mwadui 2-0 African Sports
Majimaji 1-0 Kagera Sugar