Lakini kwa makosa ya kibinadamu, akakataa bao safi la tatu la Gor katika mchezo wa Kundi B dhidi ya APR na mwisho wa mchezo, timu hizo zikatoka sare ya 2-2.
Gor ilihitaji kushinda mechi mbili za mwisho za kundi lake dhidi ya APR na Telecom ya Djibouti, baada ya kufungwa mechi mbili za awali na KCC ya Uganda na Atletico ya Burundi ili iende Nane Bora, lakini ikaambulia pointi mbili katika mechi hizo kwa sare ya 2-2 kila mchezo.
Gor iliingia katika mchezo dhidi ta Telecom ikiwa tayari inajua KQ inawasubiri Uwanja wa Ndege wa Kigali kuwarejesha Nairobi- hivyo walikuwa hawana cha kupigania.
Kwa maana ya mashindano, Gor walimaliza katika mechi na APR na walirudi Uwanja wa Nyamirambo jana kukamilisha ratiba. Lakini wengi hawajafurahishwa kutolewa kwa timu hiyo inayofundishwa na Mscotland, Bobby Williamson.
Kwa sababu ni timu nzuri, ina wachezaji wazuri na katika mechi zake zote ilikosa bahati tu, ilikuwa inatengeneza nafasi nyingi, inashindwa kutumia na katika mchezo dhidi ya APR refa wa Tanzania Bara aliwamaliza kwa kukataa bao lao.
Gor Mahia ilikaribia kabisa kupata ushindi wa kwanza katika michuano ya mwaka baada ya kutoka nyuma kwa bao 1-0 kipindi cha kwanza na kuongoza kwa 2-1 hadi sekunde chache kabla ya filimbi ya mwisho.
Hata hivyo, bao la dakika ya 90 na ushei la Bernabe Mubumbi akimalizia krosi ya Jean Baptiste lilizima ndoto hizo na kulazimishwa sare ya 2-2. Siku hiyo, Jean Claude Mugiraneza alitangulia kuifungia APR dakika ya 22 kabla ya Godfrey Kizito kusawazisha dakika ya 60 na Godfrey Walusimbi kufunga la pili dakika ya 84.
Dan Sserunkuma aliifungia bao la tatu Gor dakika ya 88, baada ya kipa wa APR kuutema mpira mrefu wa kichwa wa kurudishiwa na mshambuliaji huyo akauchukua na kuutupia nyavuni, lakini refa Israel Mujuni akakataa, kwa dhana mlinda mlango alipamiwa.
Bobby Williamson aliondoka Uwanja wa Nyamirambo kwa hasira akiwabwatukia marefa. “Soka ni soka, lakini huyu refa na mshika kibendera wake wamefanya tufungwe hawafai kabisa hawa watu, mchezaji kaangushwa pale, hakupiga filimbi, mpira umeendelea kuchezwa hadi tumefungwa (bao la kusawazisha) ”alisema kwa hasira Bobby na kuondoka zake.
Jambo moja tu unaloweza kusema juu ya kuondolewa kwa Gor, ni walikosa bahati.
TAJI LIKO WAZI, MABINGWA WAREJEA NYUMBANI MAPEMA
Vital’O walirithi taji lililoachwa wazi na Yanga SC mwaka jana ambao waligoma kwenda Sudan wakihofia mapigano ya wenyewe kwa wenyewe yaliyokuwa yakiendelea huko.
Baada ya ushindi huo, mfungaji wao tegemeo, Amisi Tambwe akanunuliwa na Simba SC ya Tanzania Bara, ambako amekwenda kuwa mfungaji bora wa Ligi Kuu ya nchi hiyo pia.
Hakuna kilichowezekana kwa Vital’O bila Tambwe Mabao, imetolewa mapema katika hatua ya makundi na kuacha taji lishindaniwe na timu nane, Azam, APR, Atlabara, Atletico, El Merreikh, Polisi, KCC na Rayon.
Timu nyingine zilizoishia hatua ya makundi ni KMKM ya Zanzibar, Adama City ya Ethiopia, Benadir ya Somalia na Telecom ya Djibouti.
ROBO FAINALI NI ZA KUKATA NA SHOKA.
Kwa wanaoijua vyema soka ya Afrika Mashariki na Kati, hapana shaka wanajua ubora wa El Merreikh ya Sudan- sasa itakutana na Azam FC ya Tanzania Bara katika Robo Fainali.
Azam ni timu nzuri, inacheza vizuri na ni miongoni mwa timu zinazotabiriwa kutwaa Kombe mwaka huu, lakini ukweli ni kwamba, kukutanishwa na Merreikh ni sawa na kupitishwa daraja bovu, ambalo halikawii kuwadondosha.
Azam FC wakivuka mtihani huo- wazi watakuwa wamefuzu zoezi gumu kuelekea kutwaa taji la kwanza la michuano ya mabingwa wa CECAFA.
Merreikh pia inaweza kupata mbeleko ya marefa dhidi ya Azam kutokana na umoja na upendo uliopo baina nchi wanachama wa CECAFA zinazozungumza Kiarabu, ambazo ni Sudan, Ethiopia, Somalia, Sudan Kusini, Eritrea na Djibouti.
Na katika michuano hii asilimia kubwa ya marefa wanatoka nchi hizo- na tayari imeonekana katika mechi za makundi umoja huo ukifanya kazi vizuri.
Israel Mujuni amejenga mazingira ya Wakenya kuichukia Tanzania baada ya kukataa bao zuri la Gor Mahia dhidi APR, marefa wa Rwanda hakuna uhakika kama watapenda Azam iende Nusu Fainali, labda Waganda.
Wazi Azam itapitia katika mtihani mgumu- jambo ambalo wanapaswa kulitambua mapema ili ‘wakaze msuli’ haswa kama wanataka kurejea na Kombe Dar es Salaam.
APR na Rayon ni wapinzani wa jadi katika soka ya Rwanda- na kesho itapigwa mechi yenye msimsiko zaidi ya zote kwenye mashindano haya Uwanja wa Nyamirambo.
Polisi na askari wa jeshi la Rwanda pia watasimama katikati ya mashabiki wa APR na Rayon kuhakikisha hawagusani- Uwanja utafurika mno na wachezaji wataonyeshana kazi.
Wenyeji wa hapa wanasema ni mechi ambayo imekuja mapema, angalau ingekuja katika hatua ya Nusu Fainali- lakini kwa kuwa ndiyo imeshakuwa hakuna namna- acha kinukishwe kesho Nyamirambo.
Wachezaji wa Gor Mahia na Telecom katika mchezo wa jana Nyamirambo uliomalizika kwa sare ya 2-2
Wachezaji wa KCC na APR katika mchezo wa jana ambao timu ya Uganda ilishinda 1-0
Rahisi sana kutabiri matokeo ya Robo Fainali nyingine kwamba Polisi itaitoa Atletico na KCC itaitoa Atlabara, lakini katika soka lolote linawezekana na matokeo yakawa tofauti.
Hadi sasa, timu yoyote itakayoingia Nusu Fainali inaweza kutwaa na Kombe pia- kwa kuwa viwango havipishani sana. Moto utawaka kesho baina ya wana Mji wa Kigali- APR na Rayon, ila Azam wamepitishwa daraja bovu kwa Merreikh, wavuke kwa tahadhari.