Mabao ya Emmanuel Okwi, Mrisho Ngassa, Nadir Haroub 'Cannavaro' na mawili kutoka kwa mtokeabenchini, Hamis Kiiza yaliwapa Yanga ushindi mnono kwenye Uwanja wa Taifa jijini Dar es Salaam na kujiimarisha katika nafasi ya pili ya msimamo wakiwa na pointi 46, nne nyuma ya Azam.
Vinara Azam, ambao wamefikisha pointi 50 wakiwa wamecheza mechi moja zaidi ya Yanga, walipata ushindi huo kwenye Uwanja wa Mkwakwani kupitia magoli ya John Bocco 'Adebayor' (dk.59), na Brian Umony (dk.82) na kujiweka katika mazingira mazuri kutwaa ubingwa wao wa kwanza katika historia zikiwa zimebaki mechi nne.
Kwenye Uwanja wa Taifa, Yanga walipata goli la kwanza katika dakika ya 22 kupitia kwa Okwi aliyepiga shuti kali la chini la umbali wa mita takribani 26 wakati akipiga faulo iliyotolewa na refa Andrew Shamba kutoka Pwani baada ya beki na nahodha wa Prisons Lugano Mwangama kumkwatua raia huyo wa Uganda.
Prisons walipata fursa ya kusawazisha goli hilo katika dakika ya 35 wakati beki wa Yanga, Oscar Joshua alipocheza madhambi ndani ya boksi na kuzaa penalti ambayo Mwangama alipaisha mbele ya kipa Juma Kaseja ambaye alikuwa tayari amepotea langoni.
Katika tukio hilo, nahodha wa Yanga, Cannavaro alionywa kwa kadi ya njano kwa kupinga maamuzi ya refa.
Yanga walipata goli la pili katika dakika ya 38 kufuatia shambulizi kali la kushtukiza kupitia kwa mshambuliaji mtokeabenchini Hussein Javu aliyekimbia na mpira kutoka katikati ya uwanja na kumimina krosi murua iliyomkuta winga Ngasa akiwa peke yake na akautumbukiza mpira nyavuni.
Kiiza, ambaye aliingia katika dakika ya 60 kuchukua nafasi ya Okwi ambaye aliumia tumbo na kutolewa kwa machela, aliiandikia Yanga bao la tatu katika dakika ya 68 akiitendea haki krosi safi ya ndani ya sita kutoka kwa Simon Msuva iliyoshuhudia mpira ukimpita ubavuni kipa kabla ya kumfikia Mganda huyo.
Mapishi ya goli hilo yalianzia katika kazi hiyo iliyofanywa na kiungo Hassan Dilunga katikati ya uwanja kabla ya kutoa pasi kwa Msuva pembeni Kaskazini Magharibi mwa lango la Kaskazini mwa Uwanja wa Taifa.
Cannavaro aliipatia Yanga goli la nne kwa njia ya penalti katika dakika ya 78 kufuatia Hussein Javu kufanyiwa faulo kwenye mstari wa boksi na Kiiza akafunga goli lake la pili jana na la tano kwa Yanga katika dakiia ya 88 akimalizia krosi kali ya Javu, ambaye kuingia kwake kuliubadili kabisa mchezo huo.
Kocha wa Prisons, David Mwamaja alisema baada ya mechi hiyo: "Kukosa penalti kulituathiri. Tungepata penalti ile tungekuwa na uwezo wa kupata matokeo mazuri. Kipa pia hakuwa vizuri katika baadhi ya mashambulizi. Kukosekana kwa Omega Seme kumetuathiri. Tutakuwa na usongo wa mechi ijayo."
Naye kocha wa Yanga, Mholanzi, Hans van der Pluijm alisema: "Vijana wamecheza kwa mbinu zetu za Kidachi. Ni ushindi mkubwa kwetu na unatuimarisha kuendelea kupambana."
Kulikuwa na watazamaji wachache waliokuwa wameingia Uwanja wa Taifa kutazama mechi hiyo ikiwa ni mwendelezo wa mwenendo mbaya wa mapato ya mlangoni kwa klabu ya Yanga tangu itolewe kwenye mashindano ya Klabu Bingwa Afrika dhidi ya Al Ahly na kisha kutoa sare mbili mfululizo dhidi ya Mtibwa na Azam FC.
Klabu hiyo ya Jangwani pia itaendelea kutoambulia chochote katika mapato ya mlangoni hadi pale Sh. milioni 106 za wachezaji wake wa zamani Stephen Malashi na Wisdom Ndhlovu zitakapokamilika kama ilivyoagizwa na Mahakama Kuu (Kitengo cha Kazi).
Tayari Shirikisho la Soka (TFF) limeanza kuikata klabu hiyo wakichukua Sh. milioni 9.2 za mgawo wa mapato ya Sh. milioni 38.6 za mechi yao iliyopita dhidi ya Rhino Rangers kulipa deni hilo lililotokana na wachezaji hao kukatishiwa mikataba yao.
Vikosi vilikuwa: Yanga: Juma Kaseja, Juma Abdul, Oscar Joshua, Nadir Haroub, Kelvin Yondani, Frank Domayo, Simon Msuva, Hassan Dilunga, Jeryson Tegete/ Hussein Javu (dk 34), Mrisho Ngasa/ Haruna Niyonzima (dk.75) na Emmanuel Okwi/ Hamis Kiiza (dk 60) .
Tanzania Prisons: Beno Kakolanya, Salum Kimenya, Laurian Mpalile, Lugano Mwangama, Nurdin Chona, Jumanne Elfadhil, Godfrey Mageta/ Jimy Shoji (dk.68), Fred Chundu, Peter Michael, Frank Hau na Ibrahim Mamba/ Six Mwakesaga (dk.49).