Mwombeki alitajwa kuwa katika hatihati ya kulikosa pambano hilo la watani wa jadi litakalochezwa kwenye Uwanja wa Taifa siku ya Jumapili baada ya kuumia mazoezini.
Hata hivyo, habari njema kwa wanachama na mashabiki wa Simba ni kwamba mshambuliaji huyo aliyesajiliwa na Simba akitokea Pamba ya Mwanza, amerejea tena uwanjani na kuna uwezekano mkubwa Jumapili atashirikiana na mfumani nyavu mahiri, Amisi Tambwe kuichachafya ngome ya Yanga.
Ofisa Habari wa Simba, Ezekiel Kamwaga aliuambia mtandao huu jana kuwa, Mwombeki amerejea tena uwanjani baada ya hali yake kutengemaa na kuwapa matumaini makubwa ya kushuka dimbani Jumapili kuiangamiza Yanga.
Kamwaga alisema hata hivyo kikosi chao bado kitaendelea kukosa huduma za wachezaji wao nyota kama Henry Joseph, Issa Rashid 'Baba Ubaya' na Miraj Adam.
"Tunashukuru hofu ya kumkosa Mwombeki imeondoka baada ya mshambuliaji huyo kurejea tena dimbani, japo Simba itawakosa Henry Joseph ambaye hayupo kambini, Baba Ubaya, Miraj Adam na Abdallah Seseme ambao ni majeruhi," alisema Kamwaga.
Kamwaga alisema kikosi chao kina morali kubwa ya kushinda mechi ya Jumapili, licha ya kudai litakuwa pambano gumu.
Pia alisema katika kuwatia motisha wachezaji ili kuigaragaza Yanga kwenye Uwanja wa Taifa, viongozi na 'matajiri' wa Simba wanatarajia kuteta na wachezaji kesho Jumamosi kwa lengo la kuwaweka sawa kisaikolojia pamoja na kuwapa nguvu zaidi ili kuwashinda Yanga.
"Viongozi na matajiri wa Simba wataitembelea kambi na kuzungumza na wachezaji kati ya Ijumaa (leo) na Jumamosi (kesho) ili kuwaweka sawa na kuhakikisha Yanga anakufa Jumapili Taifa," alisema Kamwaga.
Simba na Yanga zitakutana katika mchezo huo, huku Simba ikiwa na deni la kulipa kisasi cha kipigo walichopewa katika mechi yao ya mwisho ya ligi iliyopita iliyochezwa Mei mwaka huu ambapo Yanga ilishinda mabao 2-0.
Wakati Simba wakiwa na furaha hiyo, Yanga nao wamepata matumaini kufuatia kurejea kwa Ngasa, ambaye alikuwa akiuguma malaria.
Ngasa ambaye ametua Yanga akitokea Simba alikokuwa kwa mkopo, yuko katika kiwango cha juu hivi sasa akiwa amefunga magoli mawili na kutoa pasi za magoli mawili katika mechi zake tatu alizocheza tangu alipomaliza adhabu yake ya kufungiwa mechi sita za mwanzo wa msimu.
SIMBA WAJIBU MAPIGO
Kwa upande mwingine, uongozi wa Simba umesema hautishwi na tambo za watani wao wa jadi na umejiandaa vizuri kwa ajili ya mchezo huo utakaoanza saa 10:00 alasiri.
Mmoja wa viongozi 'wazito' wa Simba ambaye hakutaka jina lake litajwe kwa kuwa si msemaji wa klabu hiyo iliyoanzishwa 1936, alisema wamejipanga vizuri kuhakikisha wanaishangaza Yanga kwa kuishushia kipigo kikali Jumapili.
"Yanga wanaongea kujifurahisha. Katika mpira huwezi kusema unaingia uwanjani ukijua unashinda 3-0. Timu yetu imeandaliwa vizuri ili iibuke na ushindi dhidi yao," alisema kiongozi huyo huku akiweka wazi kuwa kikosi cha Simba kimeweka kambi yake Bamba Beach. Kigamboni jijini Dar es Salaam kujiandaa kwa mchezo huo.